الظلــــمة

موضوع: الظلــــمة الثلاثاء يونيو 08, 2010 2:09 am

الظلمة

الظلــــمة Thumbnail.php?file=l_obscurit___698318114

واش حكايتي معاك أنت يا الظلمة قوليلي وعلاش راكي ضاربة النح

لله جاوبيني قوليلي غير كلمة ما تخبيش عليا وقولي قاع الصح

وش راه جايني اذا راكي عالمة عارف قلبي تنجرح ومزال يتنجرح

ما تخبيش عليا صارحيني يا الظلمة احكي لا تخافي أنا نحب الي يصارح

علاش الناس بالنعاس درك راها نايمة وانايا تسهريني حتى يطلع الصبح

حكاية تجيب حكاية كلمة تجيب كلمة حتى الي ولينا صحاب تاع الصح

وليتي يالظلمة عندك واحد القيمة نحبك وغير معاك الي نتصارح

خاطر لحكاية للناس تزيد الغمة وتولي شفاية وتولي غير فضايح

نخبي في قلبي ونلايم يا الظلمة النهار الي يفوت يشبه للبارح

اليامات فايتين وانا قاعد لتما نشوف في صغري قدامي رايح

والله يا الظلمة راني كي لحمامة ملي يطلع الصبح من سطح لسطح

ولما يطيح الليل اتطيحي يا الظلمة أنا تان نطيح ولتم معاك نريح

والناس زاهية فديارها ملمومة فكل يوم عيد و فكل يوم فرح

وأنا غير وحدي عايش في غمة ومخبّي في قلبي صوالح وصوالح

مخبّي في جيبي يدي المعدومة ومخبّي في راسي احلام لبارح

ومخبّي في عيني دمعة مظلومة وأنايا متخبي في وسطكم ومريّح

والحق ديالي راه عندهم هوما تقاسموه بيناتهم وتبادلوا المصالح

باش يردّوهولي في يوم القيامة في دار الحق نهار يبان الصح

حتى الضو راي عادت مخدومة غير للي مرفه ديما جيبو مفحفح

والشمعة اللخرانية زادت فالسومة ولات تمشي معاك غير وقت الفرح

فجوايه الدراهم و جوايههم هوما صحاب ارجى هاذي اجبد او برّح

وباش توقف معايا جاتها حشومة عادت تحشم بيا وتتمشى بالصوالح

ما نلومش الوقت والدنيا الظالمة نرضى بالمكتوب ونصبر للجرح

ساعات الفقر تكون فيه حكمة يعلمها غير ربي الي بيدو الربح

ما نلومش بابا ومانلومش يما خاطر رباوني وخرجوني صالح
وكانو حتى هوما فاتو عالظلمة نشفى كنت صغير نبكي وانوّح

تشدني يما تلقى عندي حمة تحطني فصدرها وتبدى فيا اتدوّح

وتستنى بابا لما يجي مالخدمة يشريلي الدوى باش نبرى ونريّح

وراولي الطريق لمعوجة ولمسقمة وقالولي يا ولدنا الا باغي تربح

شد في دينك وفالتربية والحرمة وشد في خدمتك و اتعب او كافح

اصبر او حتى حالة ماهي دايمة وكل الابواب راهم عندهم مفاتح

وفي هاذ الدنيا الناس المحرومة في غالب الاحيان هي الي تنجح

والمال اذا كان دارلك القيمة يقيمك لبنادم الجاهل والجايح

أما الناس القارية والناس الفاهمة عارفين القلب هاذاك هو الصح

اتفائل الخير وابقى تقول ديما نقدر نربح ونخدم او ننجح

وعمرك تتشاءم يا لوكان بكلمة خاطر الكلمة تقدر تولي صح

ورد بالك غير الحسد و لملاومة والغيرة ولمعاندة ماراهمش ملاح

يخلوا قلب لبنادم يرجع عمى ويخسر فحياتو بزاف صوالح

اغتنم الوقت والوقت راه نعمة ونحي من راسك كلمة البارح

وحاول تعرف وين راك ليوما باه تقدر تعرف لوين راك رايح

ودير فبالك بلي حاجة ماهي دايمة كلش راح يفوت الفرح والقرح

ومهما كانت هاذ الدنيا مهمة حاجة فيها ماهي رايحة تريح

ياك الدنيا بروحها كانت مخدومة امتحان وفيه الفاشل والناجح

والنتائج تظهر فيوم القيامة وفاعل الخير هو الي يربح

تأليف فيصل كرشوش

.